DENOVE BLOGE

Fonto: de.fotolia.com

Inter 2003/09/25 kaj 2003/12/12 mi tenis blogon sub la titolo Periskope. En ĝi mi regule publikigis artikolojn diversspecajn kaj diverslongajn. Poste ĝi haltis kaj falis en longan kaj pezan silenton. De tiam mia vivo ofte piruetis kaj kapriolis. Disaj interesoj kaj okupoj min tiris kaj puŝis. La tiama blogo, se mi bone memoras, estis inter la unuaj en Esperanto. Poste aperis multaj blogoj, iuj eĉ altkvalitaj enhave kaj stile. Dume ekĝermis kaj ekfloris ankaŭ aliaj interretaj komunikrimedoj, i.a. la tiel nomataj sociaj retoj. La blogoj ne perdis sian interesan kaj allogon, sed ili ne plu estas la preferata kanalo por libera kaj senĝena publikigo de artikoloj aŭ eĉ de nuraj pripensoj senpretendaj.

Tamen mi plu preferas la facilecon kaj flekseblecon de la bloga sistemo. Kaj post tiom longa interrompo, mi decidis ke jam temp’ está por nova esperanta blogo miapluma. Tiel naskiĝas la nuna Parenteze. Ĝi longe vivu kaj prosperu, kaj en ĝi senhalte aperadu artikoloj kaj rezonoj, kiuj ne trovas neston aliloke. Por rekomenci, mi citu ĉi tie la unuan blogaĵon de la iama Periskope, publikigitan je 2003/09/15. Jen ĝi:

Ĉu en Esperanto ni bezonas la vorton blogo?

Certe jes. Ĉar temas pri nova koncepto, nova maniero komuniki. Publikigi bloge signifas publikigi rapide kaj facile. Sen perantoj. Sen ĝenoj. Sen redaktoroj kaj re(d)akcioj. Sen cenzuroj. Libere. Ni do enkonduku ne nur la vorton blogo, sed ankau ĝian kompletan familion sufiksan kaj prefiksan: ni kreu blogojn, ni blogu kaj reblogu, ni reagu bloge, ni eniru blogejon kaj legu blogaĵon, kaj inter bloguloj regu bloga etiketo.